नगरपालिकाले नगरकोटको बतासेडाँडामा डेढ अर्बको होटल बनाउने,

एक अर्ब ५३ करोड रुपैयाँ लागतमा निर्माण हुने भ्यू टावरबाट आठ वटा हिमशृङ्खला देख्न सकिने

बुद्धबार, मंसिर २०, २०७४ साल,
भक्तपुर। चाँगुनारायण नगरपालिकाले आन्तरिक तथा बाह्य पर्यटकलाई लक्षित गरी सुविधासम्पन्न आधुनिक भ्यू टावर सहितको होटल निर्माण गर्ने भएको छ।
 
नगर प्रमुख सोम मिश्रले यसबारे जानकारी दिँदै नगरपालिकाले नगरकोटको बतासे डाँडामा १० तलाको भ्यू टावर सहितको होटल निर्माण गर्ने बताएका हुन्।
 
कूल एक अर्ब ५३ करोड रुपैयाँ लागतमा निर्माण हुने भ्यू टावरबाट आठ वटा हिमशृङ्खला देख्न सकिने, आधुनिक र अन्तर्राष्ट्रिय मापदण्ड, चारवटा लिफ्ट, लक्जरी रुम र दशौँ तलामा रिभोलिङ अर्थात् घुम्ने रेस्टुरेन्टको समेत व्यवस्था गरिने नगर प्रमुख मिश्रले बताए।
 
सार्वजनिक निजी साझेदारीको अवधारणामा यसै वर्षदेखि निर्माण शुरु गरिने उक्त भ्यू टावरसहितको होटल अन्तर्राष्ट्रिय मापदण्डअनुसार २० देखि ३० वर्षसम्मका लागि लगानी गर्ने प्राइभेट कम्पनीलाई दिएर नगरपालिकाको स्वामित्वमा आउने गरी व्यवस्थापन मिलाइएको छ।
 
सांस्कृतिक संग्रहालय, सपिङ सेन्टर, मूर्तिकला कला तथा हस्तकला, सभा हल, फिटनेस सेन्टर, लक्जरी रुम, सूर्योदय हेर्ने भ्यू टावर, पौडीपोखरीलगायतको संरचना रहनेछन्। कूल एक लाख ५० हजार वर्गफिट क्षेत्रफलमध्ये १४ हजार ५०० वर्गफिट क्षेत्रफलमा संरचना निर्माण हुने साई संकेत नेपालका अध्यक्ष गोकर्ण खनालले जानकारी दिए।
 
आर्किटेक अमृता पराजुलीले लिफ्टको प्रयोगबिना कुनै पनि तलामा जान नमिल्ने र चौथो तलाभन्दा माथिको संरचनामा जान लिफ्टको अनिवार्य प्रयोग गर्नुपर्ने, कोठामै बसेर दृश्य अवलोकन गर्न सकिने र सिधै भ्यू टावरमा जानका लागि छुट्टै लिफ्टको व्यवस्था गरिने बताइन्। रासस

हाम्रो बारेमा

सूचना विभाग, दर्ता नं. ६११/०७४/०७५, कम्पनी रजिष्ट्रारको कार्यालय दर्ता नं. १३५६००/०७१/०७२, ट्रूथ मिडिया प्रा.लि.   सम्पादक : सुवर्णराज घिमिरे प्रबन्ध निर्देशक : नबराज जोशी बाँकी »

हाम्रो फेसबुक

सम्र्पक

logo

काठमाण्डौ, नेपाल
समाचारको लागि : truthmedia14@gmail.com
                           info@arthadainik.com
फोन : 01-4223489
विज्ञापनको लागि : 9813119411