यि ६ कारणले लम्बिदै छ ओली सरकारको आयु

बुद्धबार, जेष्ठ २६, २०७३ साल,
राष्ट्रिय सरकारको सम्भावना कम
कांग्रेस, एमाले र माओवादीबीच सहमति कायम भई तत्काल राष्ट्रिय सहमतिको सरकार बन्ने सम्भावना कम छ । सहमति नबन्दै सरकारको नेतृत्व लिन किचलो गर्दा नैतिक दबाब बढ्ने डर माओवादी अध्यक्ष प्रचण्डलाई छ, बहुमतीय सरकारको नेतृत्व गर्दा ‘प्रधानमन्त्री बन्ने खेलमा लागेको’ आरोप खेप्नुपर्ने चिन्ता छ ।

माओवादी–कांग्रेस बढ्दो अविश्वास
एक महिनाअघि कांग्रेसले सरकारको नेतृत्वका लागि माओवादीलाई साथ दिने घोषणा गरेको थियो । तर, अन्तिम अवस्थामा माओवादीले धोका दिएको निष्कर्षमा कांग्रेस छ । अहिलेको पोजिसनमा कांग्रेस सके सरकारको नेतृत्व आफैँ गर्ने, नसके प्रतिपक्षमै बस्ने रणनीतिमा देखिन्छ ।

एमालेले सजिलै सरकार छाड्दैन
प्रधानमन्त्री केपी ओलीले ०७४ मंसिरमा संसदीय चुनाव गराएर मात्र आफूले सरकार छाड्ने बताउँदै आएका छन् । प्रतिपक्षी कांग्रेस र सत्तासाझेदार माओवादीबीच अविश्वास बढेको अवस्थामा आफू बलियो भएको उनको बुझाइ छ । माओवादी नेतृत्वमा राष्ट्रिय सहमति नबन्ने र तीनबुँदे भद्र सहमतिमा आफ्नो पार्टीको तर्फबाट हस्ताक्षर नै नभएकाले बाध्यकारी नहुने उनको बुझाइ छ ।

माओवादीभित्रै अप्ठ्यारो
माओवादीका तर्फबाट सरकारमा सहभागी मन्त्रीहरू तत्काल सरकार परिवर्तनको पक्षमा छैनन् । सरकारमा पार्टीको नेतृत्व गरिरहेका उपप्रधानमन्त्री टोपबहादुर रायमाझीले २२ जेठमा आयोजित एक कार्यक्रममा राष्ट्रिय सहमति कायम नभएसम्मै ओली नेतृत्वकै सरकार रहने बताइसकेका छन् । बहुमतीय सरकारको नेतृत्वबारे माओवादी आफैँ अलमलमा छ ।

सरकारबारे एमाले एकजुट
प्रधानमन्त्री ओली र प्रचण्डबीच भएको भद्र सहमतिको विषयमा सुरुमा एमालेभित्रै विवाद देखिएको थियो । तर, पछिल्लो समय बसेको स्थायी समिति बैठकले सकभर आफ्नै नेतृत्वमा राष्ट्रिय सरकार बनाउने र नभए अरू दलकै नेतृत्वमा पनि सहमति जुटाउने गर्ने निर्णय गरेको छ ।

ओलीले बहुमत गुमाएपछि मात्रै कांग्रेस छलफलमा बस्ने
कांग्रेस सभापति शेरबहादुर देउवानिकटका नेता डा। प्रकाशशरण महतका अनुसार पहिले माओवादीले नै भनेर सरकार फेर्ने कसरत गरे पनि अब त्यस्तो हुनेछैन । एकपटक धोका खाइसकेकाले ओली सरकारले बहुमत नगुमाउँदासम्म वचनकै भरमा सरकार फेर्ने कसरतमा नलाग्न देउवामाथि दबाब छ । ‘पहिले प्रचण्डजीले म असन्तुष्ट छु, सरकारबाट निस्कन चाहन्छु भनेकाले कांग्रेसले उहाँलाई सहमति दिएको हो । तर, प्रचण्डजी त्यसमा अडिनुभएन,’ महतले भने, ‘अहिले सत्तामै भएका दलहरू हामी असन्तुष्ट छौँ भनिरहनुभएको छ । त्यसो हो भने उहाँहरू सरकारबाट बाहिरिनुपर्‍यो । अनि मात्र नयाँ समीकरणको कुरा हुन्छ ।’ नयाँ पत्रिका

हाम्रो बारेमा

सूचना विभाग, दर्ता नं. ६११/०७४/०७५, कम्पनी रजिष्ट्रारको कार्यालय दर्ता नं. १३५६००/०७१/०७२, ट्रूथ मिडिया प्रा.लि.   सम्पादक : सुवर्णराज घिमिरे प्रबन्ध निर्देशक : नबराज जोशी बाँकी »

हाम्रो फेसबुक

सम्र्पक

logo

काठमाण्डौ, नेपाल
समाचारको लागि : truthmedia14@gmail.com
                           info@arthadainik.com
फोन : 01-4223489
विज्ञापनको लागि : 9813119411