पैसा र पावरका भरमा जे पनि गर्न सकिन्छ भन्ने अर्बपतिहरू फन्दामा पर्दै

मंगलवार, चैत्र १६, २०७२ साल,
काठमाडौं । देशमा पैसा र पावरका भरमा जे पनि गर्न सकिन्छ भन्ने मान्यता अब भत्कँदै गएको छ । ठूला ठूला नेताहरूलाई खुशी बनाएर अवैध काम गर्दै आएका व्यापारीहरू धमाधम कारबाहीमा पर्न थालेका छन् ।

खासगरी पछिल्लो समय प्रहरीबाट व्यवसायीहरू आतंकित भएका छन् । व्यापारको आवरण अनेक गलत धन्दा गर्ने व्यापारीहरू एकपछि अर्को कारबाहीमा पर्न थालेका छन् ।

नेपालमा सय वर्षभन्दा लामो समयदेखि व्यापारमा लागेर हरेक क्षेत्रमा कब्जा जमाएको दुगड समूहको समेत यतिबेला भागाभाग छ ।  नाकाबन्दीको बेला खानेतेलको मूल्य दोब्बर बनाएर अर्बौं कमाउन खोज्दा उक्त समूह काठमाडौं प्रहरी प्रमुख एसएसपी विक्रमसिंह थापाको फन्दामा परेका हुन् ।  प्रहरीले केएल दुगड समूहका अध्यक्ष किशनलाल दुगड र उनका तीन छोरा विकास, नरेश र कुमुदसहित अन्य सात वरिष्ठ कर्मचारीहरूविरुद्ध प्रहरीले ठगी तथा कालोबजारी मुद्दा दायर   गरिसकेको छ । पक्राउ परेका उनका दुई कर्मचारी पनि जेल परेका छन् ।

गत १७ मंसिरमा महानगरीय प्रहरी परिसर काठमाडौंले दुगड समूहको जडिबुटीस्थित स्वस्तिक आयल इन्डस्ट्रिजको डिपोमा छापा हानी मेनेजर अमन जैन र बैंकिङ हेर्ने कर्मचारी प्रमोद अधिकारीलाई पक्राउ गरेको थियो । पक्राउ परेकाहरूमाथि अनुसन्धान गर्ने क्रममा कम्पनीका  सञ्चालकहरूकै निर्देशनमा ठगी भएको खुलेको थियो । केशलाल दुगडसहित उनका तीनै छोरा तथा उच्च कर्मचारीहरू फरार छन् ।

प्रहरीले दुगड समूहको स्वास्तिक आयल इन्डस्ट्रिजका महाप्रबन्धक चन्द्रिका कुशहाव र लेखापाल रमाकान्त पारीक,  नेपालगञ्जस्थित सौरभ आयल इन्डस्ट्रिजका प्रबन्धक प्रदीपकुमार छदेण, प्रबन्धक धर्मचन्द्र दुगड र लेखापाल गौतम दुगड  पनि फरार छन् ।  प्रहरीले ठगी मुद्दाअन्तर्गत  ९ करोड ९६ लाख १३ हजार ४ सय २० रुपैयाँ र कालोबजारी मुद्दाअन्तर्गत ४ करोड ६ लाख ७९ हजार रुपैयाँ बिगो दाबी गरेको छ ।  

दुगड समूहले उक्त मुद्दा मिलाउने नेतादेखि प्रहरीका हाकिमहरूलाई किन्न खोजेको थियो । नेताहरूले मुद्दा मिलाइदिने आश्वासन दिएपनि प्रहरीले कुनै सम्झौता नगरी उनीहरूविरुद्ध मुद्दा चलाएको हो । दुगड समूहको नेपालमा खाद्यान्न, बैंक तथा हाइड्रो क्षेत्रमा समेत अर्बौंको लगानी छ । अवैध तरिकाले कमाएको पैसा नेता र मिडियालाई बाँडेर उनीहरूले गलत गतिविधि गर्दै आएका थिए । तर अन्त्यमा दुगड समूह नराम्रोसँग नांगिएको छ ।

संघाई पनि फन्दामा
बैंक, इन्स्योरेन्स, सिटी सेन्टरदेखि विभिन्न उद्योगमा लगानी भएको त्रिवेणी समूहका गोविन्दकुमार संघाई करोडपति मात्र नभई अर्बपति व्यापारी हुन् । तर जति धन भएपनि उनको पैसा बिकेन । तीन वर्षअघि प्रहरीले उनलाई हत्कडी लगाएरै छाड्यो ।

अर्बपति संघाईले २१ लाख कर छलेर त्यसको कीर्ते कागजपत्र बनाए, त्यो पनि ठेक्का हात पार्नका लागि । संघाईलाई राजश्व कार्यालयको कागजपत्र कीर्ते गरेको आरोपमा  उनी पनि दुई वर्षअघि पक्राउ परे ।

स्रोतका अनुसार धेरै व्यापारीहरूले राजश्व कार्यालयको राजश्व चुक्ता गरिसकेको नक्कली कागजपत्र बनाउने गर्दछन् । त्यसमा पनि मारवाडी व्यवसायीहरू अगाडि छन् । जुन समूह खासगरी नेपालमा अवैध कारोबारमा केन्द्रित छ । सुन तस्करीदेखि हुन्डी तथा डलरको अवैध कारोबारसम्मको काममा मारवाडी समूहका व्यक्तिहरू संलग्न छन् । संघाईलाई सिआईबीले पक्राउ गरेको थियो ।

सुन पसलेहरू जेलमा
गत वर्ष सुन पसलेलाई संगठित अपराध मुद्दा चलाउन खोज्दा पैसाको चलखेलमा सरकारी वकिल कार्यालयले मुद्दा नै चलाएको थिएन । तर यो वर्ष सुन तस्करी गर्ने सुन पसलेलाई संगठित अपराध मुद्दा चल्ने मात्र होइन, उनीहरू पुर्पक्षका लागि जेल परेका छन् ।

गत पुसको अन्तिम साता   साढे नौ  किलो सुनसहित  पक्राउ परेका  न्यूरोड भूगोलपार्कस्थित भाग्य लक्ष्मी ज्वेलर्सका सञ्चालकद्वय विक्रम मित्तल र विवेक मित्तल दुई साताअघि जेल चलान भएका हुन् ।

महानगरीय अपराध महाशाखाले ९ किलो ५ सय ८ ग्राम सुनसहित उनीहरूलाई पक्राउ गरेको थियो । सुन तस्करीमा सहयोग गर्ने भागिरथ चौधरी  पनि जेल चलान भएका छन् ।

मामा नाम गरेका एक चिनियाँमार्फत् उनीहरूले सुन किनेको बताएका  थिए ।  कलंकीसम्म उनीहरूले ल्याइदिने र त्यहाँबाट सुन ल्याएर बेच्ने गरेको उनीहरूले बताएका छन् । तर चिनियाँ समूहलाई भने प्रहरीले पक्राउ गरेको छैन । उनीहरू तातोपानी नाका हँुदै सुन तस्करी गरेको बताएका छन् । यसअघि पटक–पटक सुन तस्कर पक्राउ परेपछि जरिवाना तिरेर छुट्ने गरेका थिए । तर यसपटक भने उनीहरू जेल नै गएका छन् ।

मेनपावर क्षेत्रमा आतंक
नेपालमा कालोधन जम्मा गर्नेमा मेनपावर कम्पनीहरू पनि अग्रस्थानमा आउँछन् । गरिब नेपालीका छोराहरूले ऋण गरेको पैसा मेनपावरलाई बुझाएर पसिना बगाउन खाडी जाने तर तीनै गरिब युवाहरूलाई शोषण गरेर मेनपावर कम्पनीहरू भने रातारात करोडपति बनेका छन् ।

निुस्शल्क आउने कोटामा पनि चर्को मूल्य असुलेर धेरै व्यवसायीहरूलाई २र४ वर्षको अवधिमा नै मेनपावर व्यवसायीहरू सडकबाट करोडपति भइसकेका छन् । पैसा कमाउन लागि उनीहरूले मान्छे नै बिक्रीसमेत गर्दै आएका थिए । पछिल्लो समय प्रहरीले मेनपावार कम्पनीहरूमा छापा हान्न थालेपछि उनीहरू पनि आतंकित भएका छन् ।

मनवतस्करी र संगठित ठगी गरेको   महानगरीय अपराध महाशाखाले उपत्यकाका १७ ठूला मेनपावरहरूमा  छापा हानी १२ सञ्चालकहरूलाई  पक्राउ गरेपछि उनीहरू आन्दोलनमा उत्रिएका थिए ।

भेरी कर्णाली इन्टरनेशनका कल्पना राउत,   शिखर इन्टरनेशनलका अनुराज प्रधान,    इनोभेटिभ ह्युमन रिसोर्सका युवराज राई,  रिभर ओभरसिजका रघु पुरी, काबेली ह्युमन रिसोर्सका नवराज चौलागाई,  मोभिरा इन्टरनेशनलका अनिल राई, गोर्खा नेपाल प्रालिका बिनोद श्रेष्ठलगायतलाई पक्राउ गरेको थियो ।

पक्राउ परेकाहरूविरुद्ध प्रहरीले ठगी मुद्दा चलाएकोमा अदालतले समेत त्यसलाई स्वीकार गरी नयाँ नजिर बसाएको छ । यसअघि वैदेशिक रोजगारसम्बन्धी ठगी वैदेशिक रोजगार विभागले मात्र हेर्दै आएको थियो । विभागमा मेनपावर कम्पनीको सेटिङ हुने भएकाले उनीहरूले कारबाहीबाट उन्मुक्ति पाउने गरेका थिए । प्रहरीले कारबाही थालेपछि मेनपावर व्यवसायीहरू त्रसित भएका छन् ।

मेनपावर व्यवसायीले पनि  पनि नेता र प्रहरीकै आडमै गलत धन्दा गर्दै आएका थिए । तर ठूला नेताहरूका प्रिय व्यवसायीहरू समेत पक्राउ परेपछि यतिबेला उनीहरू पनि परेको बेला पावरले काम नगर्ने रहेछ भन्ने निष्कर्षमा पुगेका छन् । प्रहरीले पावरफूल व्यक्तिहरूलाई नै पक्राउ गरेपछि पैसा र पावरको भरमा बच्न सकिन्न भन्ने सकारात्मक सन्देश पनि प्रवाह भएको छ । नेपाल प्रहरीले नै सयौं बैंकरहरूलाई समेत जेल हालिसकेको छ । जसमा खेतान समूहका राजेन्द्र खेतानसमेत भाग्नुपरेको थियो । खासगरी नेपाल प्रहरीको सिआईबीले कसैको दबाब नमानी हाइप्रोफाइल व्यक्तिलाई पक्राउ गर्दै आएको छ । तर प्रहरी जस्तै राज्यका अन्य निकायहरू  नसुध्रिदा देशमा ठूलो सुधार भने आउन सकेको छैन । स्रोत:दृष्टि साप्ताहिक

हाम्रो बारेमा

सूचना विभाग, दर्ता नं. ६११/०७४/०७५, कम्पनी रजिष्ट्रारको कार्यालय दर्ता नं. १३५६००/०७१/०७२, ट्रूथ मिडिया प्रा.लि.   सम्पादक : सुवर्णराज घिमिरे प्रबन्ध निर्देशक : नबराज जोशी बाँकी »

हाम्रो फेसबुक

सम्र्पक

logo

काठमाण्डौ, नेपाल
समाचारको लागि : truthmedia14@gmail.com
                           info@arthadainik.com
फोन : 01-4223489
विज्ञापनको लागि : 9813119411